Sitio oficial do Clube Espeleolóxico Maúxo.

Uncategorized

Cronica da presentación de Aloianos.

IMG-20180507-WA0001Na tarde do pasado sábado, 5 de maio deste ano 2018, as máis de duascentas cadeiras do amplo salón de actos da A.C.D. Xuntanza, de Randufe (Tui), non chegaron para sentar a todas as persoas que asistiron á presentación de Aloianos, libro escrito, e mais editado, por Alberto Romero Rodríguez, máis coñecido como Romer.

Ben fiada a presentación por José Font (Radio Municipal de Tui), o acto centrouse na explicación dos contidos e do proceso de elaboración do novo libro realizado polo polifacético autor tudense (escritor, etnógrafo, poeta, guionista, actor, escultor e, entre outras mestrías, muiñeiro e gaiteiro) baixo o acertado, orixinal e bonito título de Aloianos.

IMG-20180507-WA0003Duascentas e trinta e unha páxinas, moitas delas ilustradas con fotografías a toda cor ou con vellas imaxes a branco e negro (máis debuxos e outras ilustracións), nas que se contan ducias de inéditas historias documentadas na oralidade da veciñanza do Aloia (Tui) e outras moitas historias gardadas por Romer na súa precisa memoria. Relatos etnográficos (contos como o de Silvana, refráns, ditos, costumes…), historias verdadeiras case esquecidas, evocacións dun mundo rural perdido ou transformado (non sempre para mellor), usos e costumes antigas (como os xogos infantís de antano, os traballos no campo e no monte….) sen fallar a edición de poesías propias, a edición de documentos que nos falan dos alicerces do Parque Natural do Monte Aloia, ou un moi completo estudo da toponimia do Aloia. Este traballo ao redor dos nomes do Aloia achega 685 nomes de lugar e microtopónimos desta parte da Galiza a cabalo dos concellos de Tui, Gondomar e Porriño, todos eles debidamente contrastados (entrevistáronse a máis de trinta persoas de avanzada idade e moito e variado saber popular) e situados como nunca antes en oito imaxes aéreas que permite idenficiar ben o territorio estudado.

IMG-20180507-WA0002O acto de presentación de Aloianos foi amenizado pola cantautora baixomiñota María José Baz e contou coas intervencións, asemade de José Font e mais Romer, do escritor, académico, político e ben querido profesor Xosé Luís Méndez Ferrín (que asina o limiar deste “libro enciclopédico”), e mais de Xavier Groba, secretario do Clube Espeleolóxico Maúxo, entidade da que tamén forma parte Romer. De feito, esta entidade achegou para este libro a súa colaboración na investigación do antes dito traballo ao redor da Toponimia do Aloia e mais redactou un dos capítulos do libro no que se divulgan algunhas das covas desta xeografía granítica como son A Pedra da Moura do Cotarel, A Cama de Pedro, O Niño do Bufo e As Covas da Trapa.

Advertisements

Presentación da obra ‘Toponimia de Chandebrito’

O vindeiro mércores 14 de marzo de 2018, preséntase a obra titulada Toponimia de Chandebrito. O acto está convocado para as 16:00 horas na antiga Casa Escola da referida parroquia e a presentación estará aberta durante un par de horas para toda persoa interesada en facerse cun exemplar.

Presidida polo Exc. Sr. Alcalde do Concello de Nigrán, a presentación desta publicación contará coa presenza e explicacións dos coordinadores da obra, con parte do equipo de investigación e das directivas das asociacións promotoras (Clube Espeleolóxico Maúxo e Asociación Veciñal e Cultural Chandebrito 1807) e mais da editora da publicación que vén de sair do prelo na Colección Maugio Data.

Editada en formato de caderno ilustrado a toda cor, a obra compila e estuda brevemente os máis de 750 topónimos coñecidos pola documentación histórica e a memoria oral en Chandebrito e parroquias inmediatas: Coruxo, Valadares, Vincios e Camos.
O comezo dos traballos de documentación remóntase a 1986, ano no que parte do equipo de investigación comeza a interesarse polo patrimonio cultural deste territorio. Logo dun longo proceso de revisión e edición que durou todo o ano 2017, este estudo da toponimia de Chandebrito contou tamén coa colaboración de destacados investigadores na materia, e coñecedores do territorio dos vales do Miñor e Fragoso, como son Afonso Rodríguez González, Anxo Rodríguez Lemos e Xosé Lois Vilar.

A pretensión da publicación ambiciona poder ser de utilidade para as administracións e para toda aquela veciñanza e visitantes que precisen ou desexen saber do nome (ou nomes; moitos deles de antiquísima orixe) polo que se coñecen moitos dos recunchos da paisaxe (á vista e soterrada) desta parte do concello de Nigrán lindante con Gondomar e Vigo.

Entre os contidos que a publicación ofrece, destacar o índice alfabético numerado e as nove láminas onde se sinalan, sobre fotografías áreas de calidade, e con destaque das curvas de nível do terreno, os 607 topónimos aínda vivos que se puideron contrastar na memoria oral da moita veciñanza que colaborou para facer posible a transmisión a futuro deste inestimable patrimonio cultural inmaterial, tan rico como interesante para o organización do territorio, os estudos históricos ou etnográficos, arqueolóxicos, espeleolóxicos, etc.


Comunicado do Clube Maúxo.

Diante dos graves feitos acontecidos o pasado día 15 de outubro deste ano 2017, este clube quere facer pública a súa solidariedade con todas as persoas directamente afectadas. Moi en especial, fiquen aquí explícitas as condolencias ás familias de todas as vitimas mortais. Particularmente, queremos expresar aquí a nosa fonda dor e grande penar polo ignominioso falecemento de Dona Ángela Otero e Dona Maximina Iglesias, veciñas da nosa tan querida como admirada freguesía de Chandebrito, onde non houbo máis mortos polo bo tino da veciñanza diante da desacertada improvisación e inoperativa evacuación sufrida.

DSCN3756

Tamén queremos deixar constancia do noso máis fondo rexeitamento e noxo ante a incompetencia demostrada diante destes lumes polas autoridades, moi en especial ás da Xunta de Galicia. Non ten perdón posíbel carecer de medios axeitados para a prevención e extinción de lumes como estes. Fogos provocados máis que previsíbeis tendo en conta os antecedentes históricos e os recentes lumes (acontecidos mesmo durante os días previos nas provincias de Lugo e Ourense), a situación de grave seca que viña de moitos meses atrás, a sabida chegada para ese día de ventos quentes e fortes do sur-oeste, e a reiterada situación de abandono da masa forestal que finalmente ardeu con toda virulencia e graves danos só mitigados pola exemplar reacción de moitos veciños e veciñas que non fuxiron, que non se amedrentaron, que se auto-organizaron e puxeron en risco súa integridade física e pobres medios de extinción para que os incendios dese nefasto día non fosen a máis.

Finalmente, reclamamos, esiximos, pedimos e clamamos para que, a quen lle corresponda, asuma e faga asumir as responsabilidades penais, administrativas e políticas para quen tiña a obriga de defender a vida, a integridade física, as propiedades privadas, comunais e colectivas da cidadanía. Pedimos castigo para quen axuda aos pirómanos a destruír o país, ben coas súas políticas depredadoras, ben coa súa ineptitude. E toda a vergoña e o ostracismo público para quen utiliza a radiotelevisión pública (RTVE, RTVG) e os medios privados de intoxicación para o seu porco servizo. Nunca máis sistemática ocultación de información, silencios e mentiras interesadas. Nunca máis ineptos en cargos públicos.

¡¡LUMES NUNCA MÁIS!!

 


Denuncia deposito de lixo no Castro de Chandebrito.

IMG-20170417-Lixo_Chandebrito

Dende o Clube Maúxo rexeitamos este deposito de entullo e lixo nas beiras do Castro de Chandebrito. Así como a utilización do mesmo como recheo para as pistas próximas.

Así mesmo apoiamos a asociación Chandebrito 1807 nos actos de defensa deste relevante patrimonio da parroquia e do seu  entorno.


A CERÁMICA CAMPANIFORME DO MONTE PINDO.

O pasado martes día 16 de febreiro deste ano 2016, a páxina web da benemérita asociación Monte Pindo Parque Natural daba conta da presentación e promoción dunha “reprodución dunha vasilla campaniforme neolítica” que se correspondería coa fai uns anos atopada por membros deste Clube Espeleolóxico Maúxo no interior dun sistema de cavidades do citado monte de Carnota.

Desde aquí queremos aproveitar a ocasión para desexar que a inciativa, cando menos, axude a promocionar as xustas e ogalla que prontas medidas de protección, salvagarda, estudo e promoción que fagan do Monte Pindo, canto antes, como ben se reivindica, un espazo cada vez mellor coidado, coñecido e desfrutado por toda a sociedade. Desde este C. E. Maúxo, como é sabido e público, compartimos a inquedanza e vaia, pois, de novo a nosa solidariedade con ese obxectivo a prol do Pindo: Parque Natural.

Con todo, consideramos axeitado facer públicas as seguintes matizacións:

HPIM4792a

 

  1. A cerámica de tradición campaniforme rescatada polo Clube Maúxo do interior dunha das covas d’O Pindo (de nome e coordenadas reservadas aquí por cautela) é só un pequeno fragmento. Os feitos da súa casual descuberta e da decisión do seu rescate (derivada do evidente perigo de desaparición ou deterioro ao estar á vista e en contacto co curso de augas soterrado) foron inmediatamente comunicados polo C. E. Maúxo ás autoridades competentes (Dirección Xeral de Patrimonio Cultural da Xunta de Galicia) quen contaron con toda a información por escrito tanto do recuperado como do potencial arqueolóxico propio desta cova do Monte Pindo. A mencionada peza foi depositada pola referida entidade espeleolóxica (xunto cos outros 8 fragmentos cerámicos recuperados do interior da cavidade) o día 5 de marzo de 2008 no Museo Arqueolóxico e Histórico de San Antón (A Coruña) como así consta no oportuno informe adxunto, acta de depósito e comunicados correspondentes.
  2. Tal e como se pode comprobar na referida documentación e no citado museo, o fragmento campaniforme desta cova do Pindo non sofríu rotura, raspado ou estracción de mostra material algunha. Desde o seu rescate ata o seu depósito museístico, a peza estivo en todo momento baixo custodia da secretaria deste C. E. Maúxo e nunca se accedeu ás  pretensións de datar por termoluminiscencia dito fragmento cerámico xa que tal operación conlevaba a destrución da mostra (de evidente valor cultural en si mesma) e dos permisos legais oportunos que ao Clube Maúxo non nos correspondía nin tramitar nin, moito menos, autorizar ou favorecer.
  3. Así pois, desde o C. E. Maúxo lamentar moi en serio que se divulguen falsos datos ao respecto, de todo carentes de creto, xa que como fica dito en ningún momento se facilitou a datación por termoluminiscencia da referida peza de tradición campaniforme localizada no Monte Pindo. Ademáis, como todos os fragmentos recuperados do interior desta cova do Monte Pindo, ao anaco campaniforme en cuestión lle corresponde unha datación de, como moito (o que non é pouco) uns 4.000 anos de vello; tal e como se ten aceptado desde a ciencia prehistórica grazas a tantos e tantos outros xacementos arqueolóxicos con restos cerámicos campaniformes propios dos primeiros intres da Idade do Bronce estudados debidamente por toda a franxa atlántica europea.
     Cerámica Pindo

     


Domingo 4 de outubro: VI Andaina pola protección da serra do Galiñeiro

DEFENSA-DO-GALIÑEIRO9

Unha nova edición desta andaina para non esquecer que todos os proxectos que ameazan este entorno seguen voando sobre as nosas cabezas. E por suposto na mente dos políticos e das empresas que están detras delas.

Participade para poder seguir disfrutando deste marabilloso entorno.


Nova desfeita ecolóxica e paisaxística en Priegue.

O pasado domingo 28 de setembro deste ano 2014, membros deste Clube vimos de constatar como, durante as pasadas semanas, téñense verquido centos de camións cargados con materiais solidos en terreos da Comunidade Montes en Man Común da parroquia de Priegue, Nigrán. En concreto, os feitos localízanse no monte inmediato ao barrio da Mámoa da referida parroquia miñorana onde, antigamente, existía unha pequena canteira artesanal de granito, fai décadas abandoada.

A falla dos resultados da investigación en curso e das oportunas análises dos materiais depositados nesta parte do Concello de Nigrán, esta entidade quere lamentar e denunciar públicamente os referidos feitos por varios motivos:

Primeiro. Sospeitamos que entre o material utilizado hai lodos procedentes da hoxe en obras Estación Depuradora de Augas Residuais do Lagares, así como outros materiais contaminantes (en especial uralitas, amianto) verquidos a toneladas e sen garantías de teres sido procesados por algún tratamento de depuración e control.

IMG_20140928_122437Priegue28oct14

Segundo. A superficie afectada por estes recheos afectou a moitos máis metros cadrados dos que ocupaba a vella canteira abandonada para estenderse polas inmediacións, en terreo forestal de grande valor paisaxístico, modificando o terreo notablemente e, como se observa na fotografía adxunta, elevando ata tres / seis metros de altura (segundo o punto de medición) o relevo orixinal desta parte do monte de Priegue.

Terceiro. Esta actuación, de todo irresponsable pola natureza dos materiais verquidos, temémonos que ocasionará a contaminación das águas que traerán as vindeiras chuvias, águas que, á fin, han chegar aos acuíferos próximos das vivendas do barrio da Mámoa (a menos de 100 metros) e tamén a lugares máis afastados, monte abaixo, xa que as escorrentías e as águas soterradas non saben de cancelas no campo.

Cuarto. Sospeitamos que estes verquidos (das que non hai noticia pública de ter licenza nin permisos de medioambiente, patrimonio, concello…) son reincidentes. Tal e como informaba o xornal La Voz de Galicia do día 03 de decembro de 2011, exactamente no mesmo sitio, xa se depositaran naquela data, citamos: “restos de obras municipales, baldosas de aceras, latas, ordenadores, ruedas y toda clase de desperdicios como televisores, sanitarios y chatarra en general”. É dicir, estamos hoxe ante a segunda fase dun xeito de facer obras a prazos, é dicir, agárdase a que se esquezan ou arquiven as denuncias (neste caso de fai tres anos) para continúalas e rematalas con todo o suxo beneficio de quen as promove e leva adiante. Reincidencia, intencionalidade e a maiores, obsérvese na fotografía adxunta como, por riba desa fedorenta “terra” de cor gris, estendeuse terra coa intencionalidade de ocultar o tapado.

Quinto e último. Á espera de que as forzas de seguridade do estado ultimen o oportuno informe pericial sobre estes feitos, de que a fiscalía tome cartas no asunto con contundencia (sobre todo dada a reincidencia dos feitos), etc., pola parte que nos toca como afectados, no Clube Maúxo queremos deixar constancia aquí da nosa pública denuncia e do noso berro de desesperanza ao comprobar como esta parte da costa sur da ría de Vigo, no Miñor, tan fantástica e rica (entre outros bens, o lugar afectado pola entullada da Canteira da Mámoa, conta con numerosos petróglifos -O Currelo, v.g.- e o marabilloso Castro da Mámoa) resulta unha vez máis contaminada e estragada pola mala xestión, avara e irresponsable, de xestores que deberían velar máis pola integridade, rexeneración, coidado e uso público dos bens comunais e menos por intereses espúrios.